మానవత్వం అంటే ఇది.. వీడియో వైరల్ - MicTv.in - Telugu News
mictv telugu

మానవత్వం అంటే ఇది.. వీడియో వైరల్

April 23, 2022

మానవత్వం అనే మాటకు ఎంతోమంది ఆదర్శంగా నిలిచారు. నిలుస్తున్నారు. కొంతమంది ఆపదలో ఉన్నవారికి, మరికొంతమంది ఆకలితో అలమటిస్తున్నవారికి, ఇంకొంతమంది ఆర్థికంగా వెనకబడిన వారికి తమవంతు సహాయసహకారాలు అందజేసి, వారికి అండగా నిలబడుతారు.

ఇలాంటి ఘటనలు ప్రతినిత్యం ఎక్కడో ఓ చోట చూస్తూనే ఉంటాం. వింటూనే ఉంటాం. కానీ, ఓ ముగ్గురు వ్యక్తులు మాత్రం సాటివ్యక్తి పట్ల చూపిన మానవత్వం ప్రస్తుతం అందరి నోటా శభాష్ అనిపించుకుంటుంది. ఏం జరిగింది? ఈ ఘటన ఎక్కడ జరిగింది? అనే వివరాల్లోకి వెళ్తే.. తెలంగాణ రాష్ట్ర రాజధాని హైదరాబాద్‌లోని కూకట్ పల్లిలో ఓ వ్యక్తి ఎండ వేడిమి తట్టుకోలేక సోమ్మసిల్లి రోడ్డుపై పడిపోయాడు.

దీంతో ఆ రోడ్డుపై నుంచి వెళ్తున్న వారందరు అతడు బాగా తాగి పడిపోయాడు అనుకున్నారు. మరికొంతమంది ఏం బాధ వచ్చిందోనని అనుకుంటూ వెళ్లిపోయారు. ఎవ్వరూ అతనిని పట్టించుకోలేదు. కానీ, సాటి మనిషికి సాయం చేసేందుకు ఓ ముగ్గురు వ్యక్తులు ఒకరి తర్వాత ఒకరు ముందుకొచ్చారు. ఆ వ్యక్తికి సపర్యలు చేసి, అతనికి మెలుకువ వచ్చే వరకు అక్కడే ఉన్నారు. అంతేకాకుండా అతనికి కావల్సిన డబ్బులు కూడా ఇచ్చారు.

ఈ వీడియోను సైబరాబాద్ పోలీసులు సోషల్ మీడియాలో షేర్ చేశారు. ఈ వీడియో ప్రస్తుతం తెగ వైరల్‌ అవుతుంది. కానీ, ఆ వీడియోలో సహాయం చేసిన వ్యక్తులు ఎవరు అనేది మాత్రం పోలీసులు వివరాలు వెల్లడించలేదు.