దేశమంతా హిందీ మాట్లాడాల్సిందే.. అమిత్ షాపై నిప్పులు 

బీజేపీ మళ్లీ ‘హిందీ’ అగ్గి రాజేసింది. దేశమంతా ఒకే భాష మాట్లాడాల్సిన అవసరం ఉందని, అప్పుడే భారత దేశానికి ప్రత్యేక గుర్తింపు ఉంటుందని కేంద్ర హోం మంత్రి, బీజేపీ అధినేత అమిత్ షా కలకలం సృష్టించారు. ఈశాన్య భారతంలోని విద్యార్థులకు హిందీ భాషను తప్పనిసరి చేయాలన్నారు. ఈ రోజు హిదీ దివసాన్ని పురస్కరించుకుని ఆయన సోషల్ మీడియాలో, సభలో ఈ వ్యాఖ్యలు చేశారు.

‘భారతదేశం అనేక భాషలకు నిలయం. ప్రతి భాషకు ప్రత్యేక గుర్తింపు ఉంది. అయితే భారతీయులందరినీ ఐక్యంగా ఉంచాలంటే ఒకే భాష ఉండాలి. మాతృభాషతోపాటు హిందీ కూడా మాట్లాడాలి. అలా చేసినప్పుడే గాంధీ, సర్దార్‌ పటేల్‌ కలలు నెరవేరతాయి. ఎన్ని భాషలున్నా ఈ దేశానికి ఓ భాష అంటూ ఉండాలి. అలా ఉంటేనే ఈ దేశంలో పరాయి భాషలకు చోటుండదు. అందుకే మన స్వాతంత్ర్య సమరయోధులు హిందీని రాజభాషగా ముందుకు తెచ్చారు..’ అని అన్నారు.