వందే భారత్ ఎక్స్ ప్రెస్ రైలుపై రాళ్లదాడి పరిపాటిగా మారింది. కావాలని చేస్తున్నారో లేదా ఆకర్షణీయంగా కనిపించేసారికి రాళ్లు విసురుతున్నారో తెలీదు కానీ వందే భారత్ ట్రైన్ కనిపిస్తే చాలు కొంతమంది ఆకతాయిలు చేతులకు పనిచెప్తున్నారు. గత నెలలో ప్రారంభమైన సికింద్రాబాద్-విశాఖ వందేభారత్ ట్రైన్‌పై మరోసారి దాడి జరిగింది. రైలు ప్రారంభానికి ముందే విశాఖ కంచరపాలెం వద్ద రాళ్ల దాడి జరగ్గా..కొన్ని రోజుల కిందట ఖమ్మం జిల్లాలో వందేభారత్ పై రాళ్లు విసిరారు.
తాజాగా మహబూబాబాద్-గార్ల స్టేషన్ల మధ్య వందేభారత్ ఎక్స్ ప్రెస్ను ఓ వ్యక్తి రాయితో కొట్టాడు. దాంతో C-8 కోచ్‌ అద్దం ధ్వంసమైంది. అయితే ప్రయాణికులకు ఎలాంటి గాయాలు కాలేదు. ఈ రైలు సికింద్రాబాద్ నుంచి విశాఖ వెళ్తుండగా ఈ ఘటన చోటుచేసుకుంది. తెలుగు రాష్ట్రాల్లోనే కాకుండా దేశ వ్యాప్తంగా పలు ప్రాంతాల్లో నడుస్తున్న వందే భారత్ రైళ్లపై దాడులు జరుగుతున్నాయి.మరోవైపు దేశంలో రైళ్ళ సంఖ్యను క్రమంగా పెంచుతోంది కేంద్ర ప్రభుత్వం. నిన్న ముంబై-సాయినగర్ షిర్డీ, ముంబై-సోలాపూర్ మధ్య రెండు రైళ్లను ప్రధాని మోడీ ప్రారంభించారు.దీంతో దేశంలో వందే భారత్ రైళ్ల సంఖ్య 10కి చేరింది.
