భద్రాద్రి భక్తులకు చేదువార్త.. టికెట్ల ధరలు పెంపు - MicTv.in - Telugu News
mictv telugu

భద్రాద్రి భక్తులకు చేదువార్త.. టికెట్ల ధరలు పెంపు

March 31, 2022

gddb

తెలంగాణ రాష్ట్రంలో ప్రసిద్ది చెందిన భద్రాచలం శ్రీ సీతారామచంద్రస్వామి ఆలయంలో వివిధ రకాల ప్రసాదాల రేట్లను పెంచుతూ దేవస్థానం గురువారం నిర్ణయం తీసుకుంది. అంతేకాకుండా శ్రీరామనవమి మహోత్సవాలను తిలకించేందుకు ప్రత్యేకంగా ఏర్పాటు చేసిన సెక్టార్ల టికెట్ల ధరలను పెంచుతున్నట్లు ఈవో ప్రకటించారు. తాజాగా పెంచిన ధరల ప్రకారం.. చిన్న లడ్డూ 100 గ్రాములు రూ.20 నుంచి రూ.25కు, మహా లడ్డు 500 గ్రాములు ఇదివరకు రూ.100 రూపాయలకు విక్రయించగా దానిని 400 గ్రామాలకు కుదించి, అదే రూ.100 ధర కేటాయించారు.

అలాగే పులిహోర 200 గ్రాముల ప్యాకెట్ రూ.10 నుంచి రూ.15కు పెంచారు. ఇటు చక్కెర పొంగలి 100 గ్రాములు రూ.10 నుంచి రూ.15కి, కేశఖండన టికెట్ రూ.15 నుంచి రూ.20కి పెంచారు. ఇక భద్రాచలంలో శ్రీరామనవమి ఉత్సవాలు ఎల్లుండి నుంచి ప్రారంభం కానున్నాయి. ఇందుకోసం భక్తులకు పూర్తిస్థాయిలో ఏర్పాట్లు చేస్తున్నట్లు దేవస్థానం ఈవో శివాజీ ఇదివరకే తెలిపారు. ఏప్రిల్‌ 2 నుంచి 16 వరకు శ్రీరామనవమి తిరుకల్యాణ బ్రహ్మోత్సవాలు, 10న శ్రీసీతారాముల కల్యాణం, 11న మహాపట్టాభిషేకం నిర్వహించనున్నారు.

అయితే, ఈ మహోత్సవాలను ప్రత్యేకంగా తిలకించేందుకు ఏర్పాటు చేసిన సెక్టార్ల టికెట్ల ధరలను పెంచినట్లు ఈవో వెల్లడించారు. కల్యాణాన్ని తిలకించే ఉభయదాతల టికెట్‌ గతంలో రూ.5 వేలుండగా దాన్ని రూ.7,500కు పెంచారు. ఇతర సెక్టార్లకు సంబంధించి రూ.2 వేల టికెట్‌ ధర రూ.2,500, రూ.1,116 టికెట్‌ రూ.2 వేలు, రూ.500 టికెట్‌ రూ.1,000, రూ.200 టికెట్‌ రూ.300, రూ.100 టికెట్‌ రూ.150కు పెంచినట్లు తెలిపారు. 11న మహాపట్టాభిషేకం రోజున ఉభయదాతల టికెట్‌ గతంలో రూ.250 ఉండగా రూ.1,000కి పెంచామని అధికారులు వెల్లడించారు.