తల్లి ప్రేమ అంటే ఇదే.. బిడ్డను ఆస్పత్రికి తీసుకొచ్చిన పిల్లి

‘అమ్మను మించిన దైవమున్నదా..’ అని సినిమా పాటొకటుంది. తల్లిప్రేమను కళ్లకు కంటే అలాంటి ఉదంతమొకటి తాజాగా చోటు చేసుకుంది. అమ్మప్రేమ మనుషుల్లోనే కాదు, ఏ జీవరాశిలోనైనా ఉంటుందని, బిడ్డల కోసం తల్లి పడే ఆరాటాన్ని మాటల్లో చెప్పలేమని అది రుజువు చేసింది.

టర్కీ రాజధాని ఇస్తాంబుల్‌లోని ఓ ఆస్పత్రికి పిల్లి తన బిడ్డను పరుగుపరుగనా తీసుకొచ్చింది. అనారోగ్యం పాలైన కూనను నోట కరుచుకొచ్చి.. ‘ప్లీజ్ దీనికేమో అయ్యింది. ఆడుకోవడం లేదు, పాలు తాగడం లేదు. దయచేసి కాపాడండి.. ’ అని మూగభాషలో చెప్పింది. విషయం అర్థం చేసుకున్న వైద్యసిబ్బంది పిల్లికూనను ప్రేమగా చేతుల్లోకి తీసుకుని వైద్యం చేశారు. తర్వాత కూన చలాకీగా తిరిగింది. తల్లికి సంతోషంగా గంతేసింది. ఈ ఫొటోలు సోషల్ మీడియాలో వైరల్ అవుతున్నాయి. కుక్కలాగే పిల్లులు కూడా తెలివైన జంతువులు. చుట్టుపక్కల ఏం జరుగుతుందో పసిగడుతుంటాయి.