గూగుల్ నుంచి కెమెరా వాచ్
ఇప్పుడంతా స్మార్ట్ యుగం నడుస్తోంది. స్మార్ట్ ఫోన్, స్మార్ట్ టీవీ, స్మార్ట్ వాచ్ అంతా స్మార్ట్ మాయం. ఈ నేపథ్యంలో ఐటీ దిగ్గజం గూగుల్ మరో అడుగు ముందుకు వేసి స్మార్ట్ కెమెరా వాచ్ ను రూపొందిస్తోంది. వాస్తవానికి గత రెండేళ్లుగా గూగుల్ ఈ ప్రాజెక్ట్‌పై పనిచేస్తోంది. గతేడాది ఆ వాచ్ గురించి ప్రకటించాలనుకున్నా కుదర్లేదు. కానీ, ఈసారి మాత్రం ఆ కెమెరా వాచ్ పై పక్కాగా ప్రకటన వస్తుందని సమాచారం. తాజాగా ఆ వాచ్ కోసం గూగుల్ కంపెనీ అమెరికాలో పేటెంట్ హక్కుల కోసం దరఖాస్తు చేసుకుంది. జులై 2017లోనే దరఖాస్తు చేసుకున్నా ఈ నెల 27న ఆ పేటెంట్ అప్లికేషన్ను జనానికి అందుబాటులో ఉంచినట్టు తెలుస్తోంది.
జస్ట్ ‘కెమెరా వాచ్’ అన్న పేరుతోనే ఓ ఏడు డయాగ్రమ్లను అందులో చూపించింది. అయితే, అసలు డిజైన్ను మాత్రం వెల్లడించలేదు. మరి, ఆ వాచ్కు పేటెంట్ వచ్చిందా.. రాలేదా అనే అంశమై స్పష్టత రావాల్సిఉంది. చిన్నచిన్న కంపెనీల స్మార్ట్వాచ్లలో కెమెరాలు ఉన్నప్పటికీ శాంసంగ్, యాపిల్ వంటి దిగ్గజ కంపెనీల స్మార్ట్వాచ్లలో కెమెరాలు లేవు. దీంతో కెమెరాతో స్మార్ట్ వాచ్ తెస్తున్న మొదటి పెద్ద కంపెనీ గూగుల్ అయింది. గూగుల్ పిక్సెల్ 3, పిక్సెల్ 3 ఎక్స్ఎల్లో వాడిన కెమెరాను ఈ స్మార్ట్వాచ్లో వాడుతున్నట్టు సమాచారం. సెల్ఫీలు తీసుకోవడం, వీడియో కాల్ చేసుకోవడం వంటి వాటికి ఇది ఉపయోగపడుతుందని చెబుతున్నారు.
