సీబీఐకి డాక్టర్ సుధాకర్ కేసు.. పోలీసుల తీరుపై హైకోర్టు ఆగ్రహం

వివాదస్పదంగా మారిన డాక్టర్ సుధాకర్ కేసును ఏపీ హైకోర్టు సీబీఐ విచారణకు ఆదేశించింది. శుక్రవారం జరిగిన వాదనల తర్వాత ఈ న్యాయమూర్తి ఈ నిర్ణయం తీసుకున్నారు. డాక్టర్ పట్ల పోలీసులు వ్యవహరించిన తీరును ధర్మాసనం తప్పుబట్టింది. వెంటనే సీబీఐ కేసు నమోదు చేసుకొని దర్యాప్తు చేయాలని సూచించింది. 8 వారాల్లోగా దీనికి సంబంధించిన వివరాలను కోర్టుకు సమర్పించాలని ఆదేశించింది. హైకోర్టు తీర్పును సుధాకర్ తల్లి స్వాగతించారు. ఈ నిర్ణయం తమకు ఆనందం కలిగించిందని అన్నారు.

కాగా నర్సీపట్నం ప్రభుత్వ ఆస్పత్రిలో డాక్టర్‌గా పని చేస్తున్న సుధాకర్ ప్రభుత్వం తమకు మాస్కులు ఇవ్వలేదంటూ ఆరోపించాడు. దీంతో అతనిపై క్రమశిక్షణ చర్యల కింద సస్పెన్షన్ వేటు వేశారు. ఆ తర్వాత కొన్ని రోజులుకు ఇటీవల అర్ధనగ్నంగా నడిరోడ్డుపై పిచ్చిగా అరుస్తూ.. కనిపించాడు. అతని చర్యలతో పోలీసులు అదుపులోకి తీసుకున్నారు. ఈ క్రమంలో అతనిపై పోలీసులు వ్యవహరించిన తీరు వివాదస్పదమైంది. ఆ తర్వాత కేజీహెచ్‌లో చేర్పించగా.. మానసిక పరిస్థితి బాగోలేదని తేల్చారు. ఈ వ్యవహారంపై విపక్షాలు కూడా మండిపడ్డాయి. సుధాకర్‌పై కక్ష సాధింపు చర్యలకు పాల్పడుతోందని ఆరోపిస్తున్నారు.