ఈ పండ్లను ఒకరోజు నీటిలో నానబెట్టి..ఖాళీ కడుపుతో తింటే గుండె జబ్బులు రమ్మన్నారావు.

ఈమధ్యకాలంలో మారుతున్నజీవనశైలి, ఆహారపు అలవాట్లతో ప్రతిఒక్కరూ అనారోగ్యం బారినపడుతున్నారు. తొందరగా నీరసించిపోవడం, ఆందోళన, ఒత్తిడి, ఇలా ఎన్నో అనారోగ్య సమస్యలను ఎదుర్కొంటున్నారు. ముఖ్యంగా ఈ మధ్య గుండెజబ్బులు ప్రతిఒక్కర్నీ భయబ్రాంతులకు గురిచేస్తున్నాయి. వయస్సుతో సంబంధం లేకుండా చిన్నా పెద్దా ఈ వ్యాధుల బారిన పడుతున్నారు. కాబట్టి ఆరోగ్యంపై శ్రద్ద తీసుకోవడం చాలా అవసరం. క్షీణిస్తున్న ఆరోగ్యాన్ని నయం చేయడంలో డ్రైఫ్రూట్స్ ప్రధాన పాత్ర పోషిస్తాయి. బాదం, వాల్ నట్, ఎండు ద్రాక్ష, జీడిపప్పు ఇలా వీటిన్నింటిలో ఎన్నో పోషకాలు దాగి ఉన్నాయి. ఇవే కాకుండా అంజీర్ కూడా ఆరోగ్యానికి ఎన్నో ప్రయోజనాలను అందిస్తుంది. అరేబియా, ఆఫ్ఘనిస్తాన్, ఇరాన్, దక్షిణాఫ్రికాలో అంజీర్ విరిగా సాగుచేస్తారు. భారత్ లో కాశ్మీర్‌లో ఎక్కువగా కనిపిస్తాయి. ఆయుర్వేదం ప్రకారం, అంజీర్ పిత్త వ్యాధులను నివారిస్తుంది. ముఖ్యంగా కడుపు, గుండె, మెదడు వ్యాధులకు ఎంతో ప్రయోజనకరంగా ఉంటుంది.

అంజీర్ పండ్లలో రాగి, సల్ఫర్, క్లోరిన్ ఉంటాయి. అంతేకాదు వీటిలో విటమిన్ ఎ, బి, సి పుష్కలంగా లభిస్తాయి. తాజా అంజీర్ పండ్ల కంటే ఎండినవాటిలో చక్కెర, మూడు రెట్లు ఎక్కువగా కనిపిస్తాయి. అంజీర్ ను కనీసం 12 నుండి 24 గంటలు నానబెట్టిన తర్వాత మాత్రమే తినాలి. 2 నుండి 3 అంజీర్ పండ్లను కోసి ఒక రోజూ నీటిలో నానబెట్టండి. ఆ నీటిని ఉదయం సగం వరకు మరిగించి తాగాలి. తాగిన తర్వాత మిగిలిన అంజీర పండ్లను నమిలి తినాలి. ఆరోగ్యవంతమైన వ్యక్తి రోజుకు రెండు లేదా మూడు అంజీర్ పండ్లను తీసుకోవాలి.

అంజీర పండ్లను తీసుకోవడం వల్ల ఈ వ్యాధులకు చెక్ పెట్టొచ్చు.

– అంజీర్‌లో ఒమేగా 3, ఒమేగా 6 ఫ్యాటీ యాసిడ్‌లు గుండె జబ్బులను నివారిస్తాయి.

-ఇందులో కాల్షియం సమృద్ధిగా లభిస్తుంది. అంజీర్ పండ్లలో కాల్షియం కూడా పుష్కలంగా ఉంటుంది, ఎముకలకు అద్భుతమైన టానిక్ లాంటిది. అవి ఎముకలను బలోపేతం చేస్తాయి. కీళ్లను ఆరోగ్యంగా ఉంచుతాయి.

-వీటిలో పొటాషియం ఉండటం వల్ల రక్తంలో చక్కెరను నియంత్రిస్తుంది. మధుమేహ వ్యాధిగ్రస్తులు కొన్ని ప్రయోజనకరమైన స్వీట్లను మితంగా తినాలి. అటువంటి పరిస్థితిలో, అంజీర్ తినడం ద్వారా ప్రయోజనం పొందుతారు.

-ఇందులో ఫైబర్స్ అధిక మొత్తంలో ఉంటుంది. సహజ ఔషధంలా పనిచేస్తాయి. దీర్ఘకాలంగా మలబద్ధకం ఉన్నవారు తప్పనిసరిగా అంజీర పండ్లను తీసుకోవాలి. పిల్లల మలబద్ధకంలో అంజీర్ చాలా మేలు చేస్తుంది, ఇది పిల్లల పొట్టను శుభ్రంగా ఉంచుతుంది, వారికి మంచి ఆకలి అనిపిస్తుంది. కడుపులో నులిపురుగులు కూడా నాశనం అవుతాయి.

– పైల్స్-ఫిషర్ సమస్య ఉన్నవారు అంజీర్ పండ్లను తీసుకోవడం వల్ల కూడా ప్రయోజనం ఉంటుంది.

-అంజూర ఆకుల రసం లేదా అంజూర పాలను తెల్లటి మచ్చలపై పూయడం వల్ల మేలు జరుగుతుంది.

-అంజీర పండ్లను రోజూ ఉదయం రెండు నెలల పాటు మెంతికూరతో నమిలి తింటే శరీరం లావుగా మారుతుంది. సన్నని శరీరం ఉన్నవారు దీనిని తీసుకోవచ్చు.

– అంజీర పండ్లను, ఎండు ద్రాక్షను పాలలో వేసి మరిగించి తాగడం వల్ల మలబద్ధకం తొలగి, పేగు వాపులు, రక్తహీనత తొలగిపోయి ఊపిరితిత్తులకు బలం చేకూరుతుంది.