కాంగ్రెస్ పార్టీ అగ్రనేత, మాజీ అధ్యక్షుడు రాహుల్ గాంధీ మరోసారి విదేశీ గడ్డపై ప్రధాని నరేంద్రమోదీని టార్గెట్ చేశారు. ప్రధాని మోదీయే భారత్ ను అవమానిస్తున్నారని ఘాటు విమర్శలు చేశారు. భారత్ తోపాటు మా తాతలను కూడా అవమానించారని ఫైర్ అయ్యారు. కేంబ్రిడ్జి ఉపన్యాసంలో తాను ఎప్పుడూ తప్పుగా మాట్లాడలేదని రాహుల్ గాంధీ స్పష్టం చేశారు. బీజేపీ తన మాటలను వక్రీకరించిందన్నారు.
నా తాతలను కూడా అవమానించారు – రాహుల్ గాంధీ
లండన్‌లో జరిగిన ఇండియన్ జర్నలిస్ట్స్ అసోసియేషన్ కార్యక్రమంలో రాహుల్ గాంధీ భారత్ పరువు తీశారని ఆరోపిస్తూ బీజేపీ చేసిన ఆరోపణలపై ఘాటుగా స్పందించారు. గత 60-70 ఏళ్లలో ఏమీ చేయలేదని ప్రధాని మోదీ స్వయంగా చెప్పారని, భారతదేశం దశాబ్దాన్ని కోల్పోయిందని, విదేశీయులకు ఇదంతా చేసిందని చెప్పి ప్రతి భారతీయుడిని, తన తాతలను మోదీ అవమానించారని రాహుల్ గాంధీ అన్నారు.
కేంబ్రిడ్జ్ యూనివర్శిటీ కార్యక్రమంలో రాహుల్ గాంధీ భారత మోడీ ప్రభుత్వంపై విరుచుకుపడ్డారు. భారతదేశంలోని సంస్థలు మోదీ ఆధీనంలో ఉన్నాయని అన్నారు. తన ఫోన్‌పై కూడా గూఢచర్యం చేశారని రాహుల్ గాంధీ ఆరోపించారు. కేంబ్రిడ్జ్‌లోని బిజినెస్ స్కూల్ విద్యార్థులను ఉద్దేశించి రాహుల్ గాంధీ మాట్లాడుతూ, “భారతదేశంలో మీడియా, న్యాయవ్యవస్థ నియంత్రణలో ఉన్నాయి. నా ఫోన్‌పై పెగాసస్ నిఘా పెట్టింది. మీ ఫోన్ రికార్డ్ అవుతోంది అని ఇంటెలిజెన్స్ అధికారులు చెప్పారు. నాపై క్రిమినల్ కేసులు పెట్టారు’’ అని అన్నారు.
కేంబ్రిడ్జ్‌లో రాహుల్ గాంధీ చేసిన ప్రసంగంపై వివాదాలు ఆగడం లేదు. రాహుల్ గాంధీ చెప్పిన ప్రతిదానికీ అస్సాం ముఖ్యమంత్రి హిమంత బిస్వా శర్మ సమాధానమిచ్చారు. రాహుల్ గాంధీ ఆరోపణలన్నింటికీ ఆయన తన అభిప్రాయాన్ని ట్విట్టర్‌లో స్పందించారు. “మొదట విదేశీ ఏజెంట్లు మమ్మల్ని లక్ష్యంగా చేసుకున్నారు. అప్పుడు మన వాళ్లే విదేశాల్లో మమ్మల్ని టార్గెట్ చేశారు. కేంబ్రిడ్జ్‌లో రాహుల్ గాంధీ చేసిన ప్రసంగం గౌరవనీయమైన ప్రధాని నరేంద్ర మోదీని లక్ష్యంగా చేసుకుని విదేశీ గడ్డపై మన దేశాన్ని పరువు తీయడానికి చేసిన దుందుడుకు ప్రయత్నం తప్ప మరొకటి కాదు అని ట్వీట్ చేశారు హిమంత బిస్వా శర్మ.
