Lanka's top court imposes travel ban on Mahinda, Basil Rajapaksa
mictv telugu

శ్రీలంక మాజీ ప్రధాని మహింద రాజపక్సకు గట్టి షాక్

July 15, 2022

శ్రీలంక మాజీ ప్రధాని మహింద రాజపక్సకు గట్టి షాక్ తగిలింది. దేశాన్ని విడిచి వెళ్లొద్దని ఆ దేశ సుప్రీంకోర్టు శుక్రవారం ఆదేశించింది. మహిందతోపాటు ఆయన సోదరుడు, మాజీ ఆర్థిక మంత్రి బాసిల్ రాజపక్సే, ఇద్దరు సెంట్రల్‌ బ్యాంకు మాజీ గవర్నర్లు, మరో అధికారి దేశాన్ని విడిచి వెళ్లకుండా నిషేధం విధించింది. కోర్టు అనుమతి లేకుండా ఈ నెల 28 వరకు దేశాన్ని విడిచి వెళ్లవద్దని ఆదేశించింది. ఈ మేరకు వారిపై సుప్రీంకోర్టు నిషేధం విధించింది.

ఇప్పటికే శ్రీలంకను తీవ్ర ఆర్థిక, రాజకీయ సంక్షోభంలో నెట్టేసి మాజీ అధ్యక్షుడు గొటబయ రాజపక్స దేశాలు దాటి పారిపోయిన సంగతి తెలిసిందే. ఆయన సోదరుడు 71 ఏళ్ల మాజీ ఆర్థిక మంత్రి బాసిల్ రాజపక్సే గత వారం దేశం నుంచి పారిపోయేందుకు ప్రయత్నించారు. కొలంబో ఎయిర్‌పోర్ట్‌కు వెళ్లిన ఆయనను వీఐపీ టెర్మినల్‌ వద్ద అడ్డుకున్న సిబ్బంది వెనక్కి పంపారు.

ఈ నేపథ్యంలోనే మహింద రాజపక్సే, బాసిల్ రాజపక్సేతోపాటు దేశ ఆర్థిక సంక్షోభానికి కారణమైన కీలక అధికారులు దేశం విడిచి పారిపోకుండా నిషేధం విధిస్తూ మధ్యంతర ఆదేశాలు జారీ చేయాలంటూ శ్రీలంక స్విమ్మర్, కోచ్ జూలియన్ బోలింగ్ ఆ దేశ సుప్రీంకోర్టును ఆశ్రయించారు. దీంతో ఆ దేశ అత్యున్నత న్యాయస్థానం ఈ నెల 28 వరకు దేశం విడిచి పారిపోకుండా నిషేధం విధించింది.