Man Arrested ,Who Removed Wife’s Kidney, Sold It, Abandoned Her, Married
mictv telugu

భార్య కిడ్నీని ఆమెకు తెలియకుండానే అమ్మేసి.. మరో పెళ్లి

September 13, 2022

పెద్దల సమక్షంలో పెళ్లి చేసుకున్న ఆ దంపతులకు ఇద్దరు పిల్లలు ఉన్నారు. అంతా సజావుగా సాగుతుందనుకున్న ఆ సంసారంలో వ్యసనాలకు బానిసయ్యాడు ఆ భర్త. ఎక్కడా అప్పు పుట్టకపోవడంతో అతడికొక ఐడియా వచ్చింది. భార్య కిడ్నీ అమ్మేసి ఆ డబ్బుతో ఎంజాయ్ చేయాలని స్కెచ్ వేశాడు. భార్యకు మాయమాటలు చెప్పి ఆమె కిడ్నీ అమ్మేయడానికి ప్లాన్ వేశాడు. అనుకున్నట్లుగానే కిడ్నీని అమ్మి సొమ్ము చేసుకున్నాడు. వచ్చిన ఆ డబ్బుతో మరో పెళ్లి చేసుకుని ఎంజాయ్ చేస్తున్నాడు.భార్యకు తెలియకుండా ఆమె కిడ్నీని దొంగలించిన విషయం నాలుగేళ్ల తర్వాత బయటపడింది. ఎట్టకేలకు పోలీసులు నిందితుడైన భర్తను అరెస్ట్ చేశారు. ఈ ఘటన ఒడిషా రాస్ట్రంలో చోటుచేసుకుంది.

ఒడిషాలోని కొటమెట గ్రామంలో ప్రశాంత్ కందూ- రంజిత నివసించేవారు. ప్రశాంత్ కందూ.. బంగ్లాదేశ్ నుంచి వచ్చి ఇక్కడ శరణార్థిగా నివసిస్తున్నాడు. ప్రశాంత్ కందూ- రంజితలకు వివాహం జరిగి 12 ఏళ్లు అయింది. వీరికి ఇద్దరు పిల్లలు కూడా ఉన్నారు. అయితే 2018లో కిడ్నీలో రాళ్లు తీపిస్తానంటూ భార్య రంజితను నమ్మించి భువనేశ్వర్ లోని ఓ ప్రైవేట్ హాస్పిటల్ కి తీసుకెళ్లాడు. అక్కడో డాక్టర్‌తో కుమ్మక్కై ఆమె కిడ్నీని తొలిగించి బ్లాక్‌ మార్కెట్‌లో అమ్మేశాడు. అనస్థీషియా మత్తులో ఉండటంతో ఆ మహిళకు ఈ విషయం ఏమీ తెలియలేదు. అయితే ఇటీవల పొత్తికడుపులో తీవ్రమైన నొప్పితో రంజిత హాస్పిటల్ కు వెళ్లింది. అప్పుడే అసలు విషయం బయటపడింది. మీరు ఒక కిడ్నీతోనే ఉన్నారని డాక్టర్లు చెప్పిన మాట విన్న రంజిత షాక్ అయింది. ఆ తర్వాత ఆరా తీయగా భర్త 2018లో తనను తీసుకెళ్లిన అదే హాస్పిటల్ లో చేరిన ఒకరికి అమ్ముకున్నాడని కనిపెట్టింది.

దీంతో గత నెల 24న మల్కన్ గిరి పోలీస్ స్టేషన్ లో తన భర్తపై కంప్లెయింట్ చేసింది. అంతేకాకుండా,ఎనిమిది నెలల క్రితం భర్త ప్రశాంత్ ఆంధ్రప్రదేశ్ కి వెళ్లి మరో అమ్మాయిని పెళ్లి చేసుకొని వచ్చాడని,ఆ తర్వాత బెంగుళూరు వెళ్లిపోయాడని రంజిత తన ఫిర్యాదులో పేర్కొంది. రంజిత ఫిర్యాదుతో రంగంలోకి దిగిన పోలీసులు ప్రశాంత్‌ను పట్టుకోవడానికి ఒక బృందాన్ని బెంగళూరుకు పంపారు. గతవారం పోలీసులు ప్రశాంత్ ని అరెస్ట్ చేశారు. ప్రస్తుతం రంజిత తన తల్లిదండ్రులతో ఉంటోంది.