Marriage Cannot Be Cancelled On Ground Of Minor Says Karnataka High Court
mictv telugu

‘నా భార్య మైనర్.. విడాకులు కావాలి.’ నాలుగేళ్ల కాపురం తర్వాత కోర్టుకు..

January 26, 2023

పెళ్లి చేసుకునే సమయానికి తన భార్య మేజర్ కాదంటూ ఓ వ్యక్తి నాలుగేళ్ల తర్వాత కోర్టు మెట్లెక్కాడు. తనకు ఆమెతో విడాకులు కావాలని, ఆ పెళ్లిని రద్దు చేయాలని కోరాడు. అతడి వాదనలను పరిగణనలోకి తీసుకున్న ఫ్యామిలీ కోర్టు.. ఆ పెళ్లిని రద్దు చేస్తూ నిర్ణయం తీసుకుంది. దీంతో బాధితురాలు హైకోర్టులో సవాల్ చేయగా.. ఆమెకు అనుకూలంగా తీర్పు ఇచ్చింది. వివాహాన్ని రద్దు చేయడం సాధ్యం కాదని తాజాగా స్పష్టం చేసింది. ఈ ఘటన కర్ణాటకలో చోటుచేసుకుంది.

కర్ణాటకలోని మండ్య జిల్లాకు చెందిన సుశీల- మంజునాథ్‌ల వివాహం 2012 జూన్‌ 15న జరిగింది. వివాహ సమయానికి తన భార్య వయసు 18 ఏళ్లు నిండలేదని నాలుగేళ్ల తర్వాత మంజునాథ్‌ గుర్తించారు. ఆ పెళ్లిని రద్దు చేయాలని కోరుతూ ఫ్యామిలీ కోర్టుకెళ్లాడు. పెళ్లయ్యే సమయానికి తన భార్య వయసు 16 ఏళ్ల 11 నెలల 8 రోజులని ఆధారాలను సమర్పించాడు. ఆయన వినతిని పరిగణనలోకి తీసుకుని విచారణ చేపట్టిన న్యాయస్థానం.. వివాహం చెల్లదని చెప్పి గత ఏడాది విడాకులు మంజూరు చేసింది. అయితే, దిగువ కోర్టు ఉత్తర్వులను అతని భార్య సుశీల హైకోర్టులో సవాల్‌ చేసింది. ఈ పిటిషన్‌పై జస్టిస్‌ అలోక్‌ ఆరాధె, జస్టిస్‌ విశ్వజిత్‌ల ద్విసభ్య ధర్మాసనం విచారణ చేపట్టింది. ఫ్యామిలీ కోర్టు ఆదేశాన్ని రద్దు చేస్తూ తాజాగా తీర్పు ఇచ్చింది. ఇన్నేళ్లు కాపురం చేశాక అప్పటికి మైనర్‌ అనే కారణంగా పెళ్లిని రద్దు చేయలేమని తేల్చింది.