వరంగల్ బావిలో మరో మూడు మృతదేహాలు.. - MicTv.in - Telugu News
mictv telugu

వరంగల్ బావిలో మరో మూడు మృతదేహాలు..

May 22, 2020

Warangal

బావిలో వలస కూలీల మృతదేహాలు లభ్యం కావడం వరంగల్ జిల్లాలో సంచలనం సృష్టించింది. పొట్ట చేతపట్టుకుని వచ్చిన వారంతా చనిపోవడం పలు అనుమానాలకు తావిస్తోంది. నిన్న నాలుగు మృతదేహాలు లభ్యం కాగా.. తాజాగా మరో మూడు లభించాయి. వీరంతా ఒకే కుటుంబానికి చెందిన వారిగా గుర్తించారు. కుటుంబం మొత్తం ఒకేసారి ఇలా బావిలో శవాల్లా కనిపించడం వెనక అనేక అనుమానాలు వ్యక్తం అవుతున్నాయి. వారంతా ఆత్మహత్య చేసుకున్నారా..? లేక ఎవరైనా హత్య చేశారా అనే కోణంలో పరిశీలిస్తున్నారు. 

బిహార్‌కు చెందిన మక్సూద్‌ (50) కుటుంబం 20 ఏళ్ల క్రితం వరంగల్‌కు వలస వచ్చింది. అక్కడా ఇక్కడా పని చేసుకుంటూ కొన్ని రోజుల క్రితం గీసుకొండలోని గోనే సంచులు తయారు చేసే పరిశ్రమలో పని చేస్తున్నారు. వీరంతా పరిశ్రమలోనే ఓ గదిలో నివాసం ఉంటున్నారు. తాజాగా మన్సూద్ అతని భార్య నిషా, ఇద్దరు కొడుకులు, కూతురు, మనవడు బావిలో శవాలై కనిపించారు. వీరంతా మసూద్‌, నిషా, బుషారాకతూన్‌, బేబీ, షకీల్‌, షాబాజ్‌ అలం, సోహైల్ అలంగా గుర్తించారు. అయితే వీరితో పాటు పక్కనే నివాసం ఉండే బీహార్‌కు చెందిన వలస కూలీలు ఇద్దరు కనిపించడం లేదు. దీంతో కేసు నమోదు చేసుకున్న పోలీసులు వారి కోసం గాలిస్తున్నారు. మృతదేహాలపై ఎటువంటి గాయాలు లేకపోవడంతో పోస్టుమార్టం రిపోర్టు రావాల్సి ఉందని పోలీసులు చెబుతున్నారు.