నవీన్ హత్య కేసులో కీలక పరిణామాలు చోటుచేసుకుంటున్నాయి. ఈ కేసులో ప్రధాన నిందితుడు హరిహరకృష్ణతో పాటు.. అతని స్నేహితుడు హసన్, ప్రియురాలు నిహారికను పోలీసులు అరెస్టు చేసి విచారించారు. కాగా.. ఈ కేసులో ఏ3గా ఉన్న నిహారిక విస్తుబోయే నిజాలను బయటపెట్టింది. నవీన్‌తో ప్రేమ నుంచి అతని హత్య వరకూ అన్ని విషయాలనూ వెల్లడించింది. నిహారిక చెప్పిన విషయాలు ఆమె మాటల్లోనే.. ‘‘ఇంటర్ చదువుతున్నప్పుడే నవీన్.. నేను ప్రేమించుకున్నాం. మేమిద్దరం చాలా సార్లు మా ఇంట్లో కలుసుకునేవాళ్లం. నవీన్, నేను గొడవ పడితే హరిహర కృష్ణ మాకు సర్ది చెప్పేవాడు. నవీన్‌తో నాకు గొడవ జరిగినప్పుడల్లా హరిహర కృష్ణతో చెప్పుకునే దాన్ని. మనస్పర్థలు రావడంతో నవీన్ నాకు దూరం అయ్యాక హరిహర కృష్ణ నన్ను ప్రేమిస్తున్నానని చెప్పాడు. నవీన్ నాతో మాట్లాడడం నచ్చని హరి హరికృష్ణ.. ఒకసారి.. ‘నవీన్ ను చంపేసి నిన్ను కిడ్నాప్ చేసి ఎక్కడికైనా దూరంగా తీసుకెళ్తా’ అని చెప్పాడు. ఎందుకు ఇలా మాట్లాడుతున్నావని నేను మందలిస్తే సరదాగా అన్నాను అని చెప్పాడు.
పిచ్చి పిచ్చి పనులు చెయ్యకు..
కొన్ని రోజుల తర్వాత ఒక రోజు హరిహర కృష్ణ నన్ను వాళ్ల ఇంటికి తీసుకెళ్లాడు. కత్తి, గ్లౌజులను చూపించి… అవి నవీన్‌ను చంపేందుకే కొన్నానని చెప్పాడు. అదంతా నేను నమ్మలేదు. “ఎందుకు అలా మాట్లాడుతున్నావు.. పిచ్చి పిచ్చి పనులు చేస్తే జైలుకు వెళ్తావు.. అయినా నేను నవీన్‌తో మాట్లాడట్లేదుగా.. వాడే మెల్లగా మరిచిపోతాడులే.” అని చెప్పాను. దాంతో హరి నేను ఊరికే సరదాకి అన్నానని చెప్పాడు.
హైదరాబాద్ వస్తున్నా..
జనవరి 15న హరి నాకు ఫోన్ చేసి తన స్నేహితులందరూ గెట్ టుగెదర్ పార్టీ 16 జనవరిన చేసుకుంటున్నాము అని చెప్పాడు. నవీన్ కూడా వస్తున్నాడని చెప్పాడు. కానీ వారి పార్టీ క్యాన్సల్ అయ్యందని మరుసటి రోజున నాకు హరి ఫోన్ చేసి చెప్పాడు. ఫిబ్రవరి 17 న ఉదయం 9:40 గంటలకి నవీన్ తన ఫోన్ నుంచి హైదరాబాద్ వస్తున్నానని మెసేజ్ చేశాడు. ఆ తర్వాత కొద్దిసేపటికే హరి నాకు ఫోన్ చేసి నవీన్ వస్తున్న విషయం చెప్పాడు. నవీన్ కాల్ చేస్తే నేను వేరే వాళ్ళతో రిలేషన్ లో ఉన్నానని చెప్పమన్నాడు. నేను కూడా నవీన్ తో అదే విషయం చెప్పాను. ఎందుకు అలా చేస్తున్నావ్ అని నవీన్ అంటుండగానే నేను ఫోన్ కట్ చేశాను.
వాడు నీతో మళ్లీ మాట్లాడడు..
కాసేపటికి హరిహరకృష్ణ తనకు ఫోన్ చేసి.. “ఇక నవీన్ నీతో మళ్లీ మాట్లాడడు..” అని చెబితే సరే అని చెప్పాను. ఇక తర్వాతి రోజు ఫిబ్రవరి 18న తనను కలవాలని హరిహరకృష్ణ మెస్సేజ్ చేయటంతో.. ఉదయం 9:30 కి.. వనస్థలిపురం నాగార్జున స్కూల్ పక్కన ఉన్న గల్లీలో రోడ్డుమీద హరిని కలిశాను. అప్పుడు హరి పాత బట్టలు వేసుకుని రాగా.. ‘ఎందుకు ఇలాంటి బట్టలు వేసుకున్నావు ఎవరివి బట్టలు’ అని అడిగాను. ‘నవీన్‌ని నేను రాత్రి చంపేశాను నా బట్టలకు రక్తం అంటితే హసన్ బట్టలు వేసుకున్నాను. హసన్‌కి కూడా నవీన్ హత్య విషయం చెప్పాను. హసన్‌తో కలిసి నవీన్ అవయవాలు ఉన్న బ్యాగ్‌ని వారి ఇంటికి దూరంగా.. చెట్లలో పడేశాను’ అని నాతో చెప్పాడు. నేను అతనితో ఎందుకు అలా చేసినావు వేరే లాగా మాట్లాడుకుని ఉండొచ్చు కదా అన్నాను. ఆ తర్వాత హరి వరంగల్ వెళ్తాను డబ్బులు కావాలి అని అడిగితే నేను హరికి 1500 ఇచ్చి వెళ్లిపొమ్మని చెప్పాను
ఇద్దరం బిర్యానీ తిన్నాం
నవీన్‌ను హరి హత్య చేసిన విషయం ఎవ్వరికీ చెప్పలేదు. మళ్లీ ఫిబ్రవరి 20న కాలేజీ నుంచి వస్తుంటే.. ఎల్బీనగర్ బస్‌స్టాండ్‌లో కలిశాడు. నవీన్‌ని చంపిన చోటు… తలపడేసిన చోటుని చూపిస్తానని తనతో తీసుకెళ్లాడు. బ్రాహ్మణపల్లి దగ్గర నవీన్ తలని, కత్తిని, సెల్‌ఫోన్ పడేసిన స్థలం ఇదేనని దూరం నుంచి చూపించాడు. అక్కడి నుంచి అబ్దుల్లాపూర్మెట్‌లో 4:30 గంటలకు ఇద్దరం కలిసి బిర్యానీ తిన్నాం. అక్కడి నుంచి తిరిగి వస్తున్న మార్గంలో.. నవీన్‌ను చంపేసిన స్థలం చూపించాడు. తిరిగి నన్ను మా ఇంటి దగ్గర దింపేసి హరి వెళ్లిపోయాడు.
హరి నంబర్ నేనే ఇచ్చా
అయితే.. నవీన్ కనిపించకపోవటంతో.. అతని స్నేహితులు వెతకటం మొదలుపెట్టారు. నవీన్ వాళ్ళ ఫ్రెండ్ తరుణ్ కాల్ చేసి… ‘నవీన్ ఫోన్ స్విచ్ ఆఫ్ వస్తుంది. నిన్న హైదరాబాద్ కి వాళ్ళ ఇంటర్ ఫ్రెండ్ ని కలవడానికి వచ్చాడు. నీకేమన్నా కలిసిండా’ అని అడిగాడు. నాకేం తెలియదని చెప్పా. అయినా కూడా అతను మళ్లీ నన్ను ‘మీ కామన్ ఫ్రెండ్ ఎవరో ఉన్నారంట.. అతని ఫోన్ నెంబర్ ఇవ్వు’ అని అడిగితే హరి నంబర్ మెసేజ్ చేశా. ఫిబ్రవరి 21న నవీన్ వాళ్ల బంధువు హరికి ఫోన్ చేసి… పోలీస్ స్టేషన్‌లో ఫిర్యాదు ఇచ్చేందుకు రమ్మని తనను పిలిచారని హరి నాతో చెప్పాడు. అప్పుడే హరి తన ఫోన్ స్విచాఫ్ చేస్తా అన్నాడు. ఏదైనా ఉంటే హసన్‌తో ఫోన్లో టచ్‌లో ఉండమని హరి నాకు చెప్పాడు. ఆ తర్వాత తన ఫోన్ స్విచాఫ్ చేసి వెళ్ళిపోయాడు.
మా బావతో మాట్లాడించా
అదే రోజు సాయంత్రం మళ్లీ తరుణ్ నాకు కాల్ చేసి… నవీన్ గురించి ఏమైనా తెలిసిందా అని అడిగితే నాకు తెలియదు అని చెప్పాను. నవీన్ వాళ్ళ మామ కూడా నాకు ఫోన్ చేసి నవీన్ గురించి ఏమైనా తెలిస్తే చెప్పమని అడిగాడు. నాకు తెలియదు అని చెప్పాను. కానీ నాకు భయం వేసి.. మా బావ భూపాల్ రెడ్డికి.. నవీన్ అనే అబ్బాయి తప్పిపోయాడని.. నా ఫ్రెండ్స్ ఫోన్ చేస్తున్నారని చెప్పా. అప్పుడు మళ్లీ నవీన్ వాళ్ళ మామ నాకు ఫోన్ చేసి.. నవీన్ గురించి అడుగుతుంటే.. మా బావ భూపాల్ రెడ్డి నా ఫోన్ తీసుకొని అతనితో మాట్లాడి ‘మీ అబ్బాయి గురించి మాకు తెలియదు. నేను అడ్వకేట్‌ని. పదేపదే నిహారిక కి ఫోన్ చేసి ఇబ్బంది పెట్టకండి’ అని చెప్పాడు. ఆ తర్వాత నాకు ఎవరూ ఫోన్ చేయలేదు. ఫిబ్రవరి 23 న నేను హసన్‌కు నేను కాల్ చేశా. హరి మిస్సయ్యాడని.. వాళ్ళ అక్కా బావ మలక్ పేట పోలీస్ స్టేషన్‌లో కంప్లైంట్ ఇచ్చారని చెప్పాడు. ‘నన్ను పోలీస్ స్టేషన్ కి పిలుస్తున్నారు నేను కూడా వెళ్తున్నాను… ఫోన్లో ఏదైనా చాట్ ఉంటే డిలీట్ చెయ్. నిన్ను కూడా పోలీస్ స్టేషన్ కి పిలుస్తారేమో’ అని హసన్ చెప్పాడు.
చాట్ హిస్టరీ డిలీట్ చేశా
ఇన్‌స్టాగ్రాంలో వాళ్లు చేసుకున్న చాట్ డిలీట్ చేసింది నిహారిక. ఇక ఆ మరుసటి రోజే (ఫిబ్రవరి 24న) ఉదయం ఎనిమిదిన్నర ప్రాంతంలో కాలేజీకి వెళ్తుంటే హరి వచ్చి బస్సు దగ్గర నిలబడి ఉన్నాడు. నా ఫ్రెండ్ హరిని చూసి నాకు చెప్పింది. వెంటనే నేను బస్సు దిగి వెళ్లి హరితో కాసేపు మాట్లాడాను. ‘నేను పోలీసులకు లొంగిపోతాను’ అన్నాడు. ఆ తర్వాత ఇద్దరు కలిసి నిహారిక ఇంటికి వెళ్లారు. ఇంట్లో ఎవ్వరూ లేకపోవటంతో.. హరిహరకృష్ణ అక్కడే స్నానం కూడా చేశాడు. ఆ తర్వాత.. నిహారిక బావ లాయర్ కావటంతో.. ప్రియురాలు సూచన మేరకు జరిగిన విషయమంతా చెప్పగా.. లొంగిపోవాలని సూచించాడు. దీంతో.. హరిహరకృష్ణ పోలీసులకు లొంగిపోయినట్టు నిహారిక ఇచ్చి స్టే‌ట్‌మెంట్‌లో పేర్కొంది.
