పరువు, మర్యాద పేర్లతో కుటుంబ సభ్యులపై దారుణాలకు తెగబడతున్నారు కొందరు వ్యక్తులు. తన సోదరి మరో మతానికి చెందిన వ్యక్తిని ప్రేమించి పెళ్లి చేసుకుందనే కక్ష్యతో ఆ యువకుడిని నడిరోడ్డుపై పొడిచి చంపాడు ఆమె అన్న. తోబుట్టువు వద్దని వారించినా.. కాళ్ల మీద పడి బతిమాలాడినా ఆమెను కనికరించలేదు. ఆఖరికి సొంత అన్నే ఆమె జీవితంలో అంతులేని విషాదాన్ని నింపాడు. హైదరాబాద్‌లోని సరూర్ నగర్ పీఎస్ పరిధిలో బుధవారం ఈ ఘటన జరిగింది.
అయితే తాజాగా అలాంటి సంఘటనే పాకిస్థాన్‌లోని పంజాబ్ ప్రావిన్స్‌లో జరిగింది. లాహోర్‌కు సమీపంలోని రెనలా ఖుర్దా ఒకారాకు చెందిన సిద్రా(21) అనే యువతిని ఆమె సోదరుడు తుపాకీతో కాల్చి చంపాడు. అందుకు కారణం.. ఆమె ఓ స్థానిక క్లాతింగ్‌ బ్రాండ్‌కు మోడలింగ్‌గా, ఫైసలాబాద్‌ నగరంలోని థియేటర్స్‌లో డ్యాన్సర్‌గా పని చేయడమే.
కుటుంబ సభ్యులతో రంజాన్ వేడుకలు జరుపుకొనేందుకు స్వగ్రామానికి వచ్చిన ఆమెను.. మోడలింగ్ తమ సంప్రదాయం కాదని, ఆ ఉద్యోగాన్ని మానేయాలంటూ తల్లిదండ్రులు, సోదరుడు ఒత్తిడి చేశారు. అయితే ఆమె తన కెరీర్‌ను వదులుకోనని తేల్చి చెప్పడంతో సోదరుడు హమ్జా ఆమెను కొట్టి, అంతటితో ఆగక ఆ మరుసటి రోజు కోపంతో ఆమెపై కాల్పులు జరిపాడు. దీంతో ఆ యువతి అక్కడికక్కడే ప్రాణాలు కోల్పోయింది. యువతి సోదరుడిపై హత్య కేసు నమోదు చేసిన పోలీసులు.. అతడు నేరం అంగీకరించడంతో అరెస్టు చేసినట్టు చెప్పారు.
