పారామిలిటరీ బలగాల వయోపరిమితి పెంపు

పారామిలిటరీ బలగాలకు కేంద్ర హోంమంత్రిత్వ శాఖ శుభవార్త చెప్పింది. వాళ్ల వయోపరిమితిని 60 ఏళ్లకు పెంచుతూ హోం మంత్రిత్వ శాఖ నిర్ణయించింది. ఈ మేరకు సోమవారం హోం శాఖ ఉత్తర్వులు జారీ చేసింది. పారా మిలిటరీ బలగాల్లో పని చేస్తున్న సిబ్బందికి ఒకే రకమైన నిబంధనలు పాటించాలన్న ఢిల్లీ హైకోర్టు గతంలో చేసిన సూచనల మేరకు కేంద్ర హోం శాఖ ఈ నిర్ణయం తీసుకుంది.

ఈ ఉత్తర్వులు తక్షణమే అమల్లోకి వస్తాయని వెల్లడించింది. వయో పరిమితి పెంపు నిర్ణయం సెంట్రల్ రిజర్వ్ పోలీస్ ఫోర్స్ (సీఆర్పీఎఫ్), బోర్డర్ సెక్యూరిటీ ఫోర్స్ (బీఎస్ఎఫ్), ఇండో-టిబెటన్ బోర్డర్ పోలీస్ (ఐటీబీపీ), సెంట్రల్ ఇండస్ట్రియల్ సెక్యూరిటీ ఫోర్స్ (సీఐఎస్ఎఫ్), సశస్త్ర సీమా బల్ (ఎస్ఎస్ బీ), అస్సాం రైఫిల్స్ (ఏఆర్)కు వరిస్తుందని తెలిపింది.