మనం రోజూ సబ్బు రుద్దుకుని స్నానం చేస్తుంటాం. శరీరాన్ని శుభ్రం చేసుకోవడానికి మనకి సబ్బే ప్రధాన సాధనం. ప్రస్తుతం మార్కెట్లోకి రకరకాల సోప్ లు వస్తున్నాయి. బార్ లు, లిక్విడ్ లని పలు రకాలుగా కూడా దొరుకుతున్నాయి. సబ్బు శరీరం నుండి బ్యాక్టీరియా, వైరస్‌లు, ఇతర వ్యాధికారక పదార్థాలను వదిలించుకోవడానికి పనిచేస్తుంది. అయితే అది కేవలం సబ్బు మాత్రమే అని మనం భావిస్తాం. మన శరీరంపై ఉన్న మలినాలను తొలగించడానికి ఉపయోగపడుతుందని అనుకుంటాం. కానీ మనం అనుకునేది తప్పు. అన్ని సబ్బులు మన మలినాలను దూరం చేయవు. సబ్బుల్లో అనేక రకాలు ఉన్నాయి. ఆ సబ్బు మన శరీరానికి మేలు చేస్తుందా లేదా కీడు చేస్తుందా అన్న విషయం మనం ఆలోచించి తీరాల్సిందే.
ప్రస్తుతం మన మార్కెట్‌లో లెక్కలేనన్ని సబ్బులు అందుబాటులో ఉన్నాయి. సాధారణ సబ్బుల నుంచి సేంద్రీయ సబ్బుల వరకు మార్కెట్‌లో విరివిగా దొరుకుతున్నాయి. రకరకాల పేర్లతో, రకరకాల రంగులతో, వివిధ రకాల ఆకారాలతో ఈ సబ్బులు ఆకట్టుకుంటున్నాయి. అంతేకాకుండా వీటినుంచి వచ్చే సువాసనలు వినియోగదారులను ఇట్టే మైమరిపింపచేస్తున్నాయి. అయితే వీటిలో ఏ సబ్బు వాడాలో మనకు తెలియదు. ఏ సబ్బు తక్కువ ధరకు లభిస్తే ఆ సబ్బును కొందరు కొనుగోలు చేస్తుంటారు. కానీ అలా చేయడం తప్పు. మీ చర్మంలోని ప్రతి రంధ్రంలోకి చొచ్చుకుపోయే సామర్థ్యాన్ని సబ్బు కలిగి ఉంటుంది. కొన్ని సోప్ లలో తీవ్రస్థాయిలో రసాయనాలు వాడుతుంటారు. మరికొన్ని సబ్బుల్లో సహజమైన నూనెలు వాడుతుంటారు. అయితే సాధారణ సబ్బు, సేంద్రీయ సబ్బుకు ఉన్న తేడాలేంటో మనలో చాలా మందికి తెలియదు.
అర్గానిక్ సోప్:
ఆర్గానిక్ సబ్బులు మన శరీరానికి ఎంతో ఆరోగ్యాన్ని ఇస్తాయి. ఆర్గానిక్ సబ్బులలో ఎలాంటి పురుగులమందులు, రసాయనాలు, ఎరువులను ఉపయోగించరు. సహజసిద్ధమైన పదార్థాలతోనే వీటిని తయారుచేస్తారు. సేంద్రీయ సబ్బులలో మొక్కల నుంచి సేకరించిన నూనెలు, గ్లిజరిన్ వంటి సహజమైన పదార్థాలు ఉంటాయి. వీటిలో ఉపయోగించే సిట్రస్ పండ్లు, మూలికలు కేవలం మొక్కల నుంచి సేకరించబడతాయి. ఆర్గానిక్ సబ్బులు ఎలాంటి హాని చేయవు. అందువల్ల వీటిని క్వాలిటీగా తయారుచేయడం ఉత్పత్తిదారుడి బాధ్యత అయితే వీటిని వాడాలని నిర్ణయం తీసుకోవడం వినియోగదారుడి బాధ్యత. అప్పుడే వీరిద్దరూ పర్యావరణానికి మేలు చేసిన వారు అవుతారు. తద్వారా మనం నివసించే నేల, పీల్చే గాలి, తాగే నీరు పరిశుభ్రంగా ఉంటాయి.
మామూలు సోప్:
సాధారణ సబ్బులలో ఎక్కువగా రసాయనాలను వాడతారు. అందువల్ల వీటిని కొంచెం ఉపయోగించినా నురుగు ఎక్కువగా వస్తుంది. ఆ నురుగును చూసి మనం మోసపోతాం. కానీ ఇది మార్కెటింగ్ జిమ్మిక్కు తప్ప మరొకటి కాదు. వాస్తవానికి ఈ నురుగు మీ చర్మాన్ని శుభ్రపరచదు. ఎందుకంటే సాధారణ సబ్బులలో ఎక్కువగా ట్రైక్లోసన్ అనే పదార్థం వాడతారు. చాలా సబ్బులలో దీని శాతం 0.1–0.45గా ఉంటుంది. సబ్బులలో ట్రైక్లోసన్ వాడకం మనకు ప్రతికూల ప్రయోజనాలను చేకూరుస్తుంది. ట్రైక్లోసన్ నీటిలో క్లోరిన్‌తో చర్య జరుపుతుంది. అంతేకాకుండా క్లోరోఫామ్ వాయువు, డయాక్సిన్ వాయువులను ఏర్పరుస్తుంది. ఈ రెండూ మానవ శరీరానికి హానికరమని భావిస్తారు. ఈ ట్రైక్లోసన్ క్యాన్సర్‌కు కూడా కారణం కావచ్చు.
సేంద్రీయ సబ్బును వాడితే వాటిలోని సహజ నూనెలు చర్మం లోతుల్లోకి చొచ్చుకుని పోయి చర్మ రంధ్రాల్లో దాగి ఉన్న మట్టిని శుభ్రం చేసి మిమ్మల్ని సురక్షితంగా ఉంచుతుంది. ఆర్గానిక్ సబ్బులలో సాధారణంగా కొబ్బరినూనె, జనపనార విత్తనాలతో తయారుచేసిన నూనెలు వంటివి ఉంటాయి. ఈ కారణంగానే మేకప్ వేసుకున్నప్పుడు ముఖాన్ని శుభ్రం చేసుకోవాలంటే సాధారణ సబ్బులను కాకుండా నూనె వంటి సహజమైన పదార్థాలను వాడాలని డెర్మటాలజిస్టులు సూచిస్తుంటారు.
సబ్బుల నాణ్యత:
మనం ఏదైనా వస్తువు కొనుగోలు చేసే సమయంలో ఖరీదైనవా?, నాణ్యమైనవా? చౌకధరవా? అని ఆలోచించి డబ్బు ఆదా చేస్తుంటాం. అయితే సబ్బు కొనుగోలు చేసేటప్పుడు కంటికి కనిపించేవే కాకుండా మరికొన్ని విషయాలు పరిగణనలోకి తీసుకోవాలి. సబ్బుల నాణ్యతను తెలుసుకోవడం ఎలా?
సబ్బు ప్యాకింగ్‌ను ఒక్కసారి సరిగ్గా గమనించండి. దానిపై టీఎఫ్ఎం 70శాతం, 67 శాతం, 82 శాతం అని రాసి ఉందో లేదో చూడండి. అదే నాణ్యతను ధ్రువీకరిస్తుంది. సబ్బులో ఉన్న కొవ్వు పదార్థాల శాతం ఆధారంగా టీఎఫ్ఎం (TFM) నిర్ణయిస్తారు. అసలు టీఎఫ్ఎం అంటే ఏమిటి? టీఎఫ్ఎం అంటే టోటల్ ఫ్యాటీ మ్యాటర్. అంటే ఈ టీఎఫ్ఎం శాతం ఎంత ఎక్కువగా ఉంటే ఆ సబ్బు అంతటి నాణ్యమైన గుణాలను కలిగి ఉంటుందని అర్థం. భారతీయ ప్రమాణాల బ్యూరో (బీఐఎస్) ప్రకారం సబ్బులను 3 రకాలుగా విభజించారు. అవి గ్రేడ్ 1, గ్రేడ్ 2, గ్రేడ్ 3. 76 అంతకు మించి శాతం ఉన్నవి గ్రేడ్ 1 సబ్బులు.
70 నుంచి 75 వరకు టీఎఫ్ఎం ఉంటే అవి గ్రేడ్ 2 సబ్బులు. 60 నుంచి 70 శాతం మధ్యలో టీఎఫ్ఎం ఉన్నవి గ్రేడ్ 3 సబ్బులు. గ్రేడ్ 2,3 సబ్బుల్లో ఫిల్లర్లు అధికంగా ఉంటాయి. ఇవి సబ్బు రూపంలో మామూలుగానే కనిపిస్తాయి. కాకపోతే వీటిలో శరీరానికి హాని కలిగించే పదార్థాలు ఎక్కువగా ఉంటాయి. ఈ సబ్బుల్లో ఆస్బెస్టాస్ వంటి రసాయనాలు కూడా అధికంగానే ఉంటాయి. వీటిని వాడితే చర్మానికి హాని కలుగుతుంది. గ్రేడ్ 2,3 సబ్బులు నీటిలో కలిసిప్పుడు మెత్తగా అయిపోయి చాలా త్వరగా అరిగిపోతాయి. నురగ ఎక్కువ వచ్చినా వాటిని నాసిరకం సబ్బులుగానే పరిగణించాలి. ఎలాంటి చర్మం ఉన్నవారికైనా గ్రేడ్ 1 సబ్బే మంచిది. ఎందుకంటే ఈ సబ్బులు చర్మానికి మృదుత్వాన్ని ఇస్తాయి. దీంతో పాటు అధిక శుభ్రతను కలగజేస్తాయి. అదనపు కెమికల్స్ లేకుండానే ఈ సబ్బులు మనకు సువాసనను ఇస్తాయి.
