ప్రస్తుతం చాలా మంది ఎదుర్కొంటున్న సమస్య హెయిర్ ఫాల్. దీనిలో ఆడ, మగ తేడాలేదు. అందరికీ జుట్టు ఊడిపోతోంది. కొందరి జుట్టు పొడవుగా ఉన్నా సన్నగా ఉంటుంది. తలమీద జుట్టు పలచబడి.. మొత్తం హెయిర్ లుక్‌నే మార్చేస్తుంది. జుట్టు పొడవుగా లేకపోయినా పర్వాలేదు.. ఒత్తుగా ఉంటే చాలు అని చాలామంది అనుకుంటారు.హెయిర్ ఫాల్ ఎక్కువగా ఉన్నా, హెయిర్ గ్రోత్ తక్కువగా ఉన్నా జుట్టు పలుచబడుతుంది. దీనికి కారణం క్యాలుష్యం ఎక్కువ కావడం, ఒత్తిడి, హార్డ్ వాటర్, శారీరక శ్రమ లేకపోవడం, పోషకాహార లోపాలు, అలర్జీలు, హార్మోన్ల అసమతుల్యత, హెయిర్ కేర్‌ సరిగ్గా తీసుకోకపోవడం, జన్యుపరమైన లోపాలు.
జుట్టు కుదుళ్ళు స్ట్రాంగ్‌గా ఉండటానికి, హెయిర్ గ్రోత్ పెరగడానికి ఇంటర్నల్‌, ఎక్స్‌టర్నల్‌ కేర్‌ తీసుకోవడం చాలా ముఖ్యం. జుట్టుకు బయట పోషణ ఇస్తూనే.. మన ఆహారం నుంచి జుట్టుకు కావలసిన పోషకాలు తీసుకోవలసి ఉంటుంది. హెయిర్ ఇంటర్నల్‌, ఎక్స్‌టర్నల్‌ కేర్‌‌కు ముఖ్యంగా మూడు పదార్థాల సహాయపడతాయి. అవేంటో మీరు కూడా ఓ లుక్ వేసేయండి.
అలోవెరా:
అలోవెరాలో ప్రొటీయోలైటిక్ ఎంజైములు ఉంటాయి. ఇవి తలపై ఉండే డెడ్ స్కిన్‌సెల్స్‌ను రిపేర్ చేస్తాయి. హెయిర్ ఫోలికల్స్ ఇన్‌యాక్టివ్‌గా మారితే.. వాటిని ఉత్తేజపరిచి జుట్టు పెరుగుదలను ప్రేరేపిస్తుంది. జుట్టు ఒత్తుగా పెరిగేలా చేస్తుంది. కలబందలో విటమిన్ ఇ ఎక్కువగా ఉంటుంది. ఈ విటమిన్ ఇ జుట్టు పెరుగుదలలో ఎంతగానో ఉపయోగపడుతుంది.
అంతేకాదు అలోవెరా అద్భుతమైన కండీషనర్‌గా పనిచేస్తుంది. కలబంద గుజ్జు.. జుట్టును మృదువుగా మెరిసేలా చేస్తుంది. చుండ్రు, దురద లాంటి సమస్యలను కూడా దూరం చేస్తుంది. హెయిర్ ఫాల్ సమస్య ఉన్నవాళ్ళు కలబందను డైట్‌లో చేర్చుకుంటే చాలా ఉపయోగం ఉంటుంది. రోజూ కలబంద జ్యూస్‌ తాగితే చాలా అనారోగ్యాలతో పాటు జుట్టు సమస్యలూ దూరం అవుతాయి.
కలబంద గుజ్జును కేశాలకు, కుదుళ్ళకు చేరేలా అప్త్లె చేసుకోవాలి. తర్వాత 30 నుంచి 40 నిమిషాలు ఆరనిచ్చి గోరువెచ్చని నీటితో తలస్నానం చేయాలి. ఇలా వారానికోసారి చేయడం వల్ల జుట్టు ఆరోగ్యంగా పెరుగుతుంది. కలబంద గుజ్జులో కొబ్బరి నూనె కలిపి.. తలకు అప్లై చేసినా మంచి రిజల్ట్స్‌ ఉంటాయి.
ఎగ్స్:
ఎగ్స్ హెయిర్ గ్రోత్‌కు బెస్ట్‌ ఆప్షన్‌. గుడ్డులో ప్రొటీన్‌, విటమిన్ బి12, ఐరన్, జింక్ ఒమేగా 6 ఫ్యాటీ యాసిడ్స్ లాంటి పోషకాలు పుష్కలంగా ఉంటాయి. ఇవి జుట్టు పెరుగుదలకు చాలా సహాయపడతాయి. గుడ్డు పచ్చసొనలో ఉండే.. విటమిన్ A,E, బయోటిన్, ఫోలేట్ జుట్టు ఒత్తుగా, ఆరోగ్యంగా పెరిగేలా సహాయపడతాయి. జుట్టు ఒత్తుగా పెరగాలన్నా, హెయిర్ ఫాల్ తగ్గాలన్నా.. రోజుకొక గుడ్డు తింటే మంచిది. ఇది జుట్టు ఎక్స్‌టర్నల్‌ కేర్‌లోనూ సహాయపడుతుంది.
1. ఒక గుడ్డు, 2 టేబుల్‌ స్పూన్ల్‌ ఆలివ్‌ ఆయిల్‌, 2 టేబుల్‌ స్పూన్ల కొబ్బరి నూనె తీసుకుని మిక్స్‌ చేయాలి. ఈ మిక్స్‌ను మీ జుట్టు కుదుళ్ళ నుంచి చివర్ల వరకు అప్లై చేయాలి. దీన్ని అరగంట పాటు ఆరనివ్వండి. ఆ తర్వాత మైల్డ్‌ షాంపుతో తలస్నానం చేయండి.
2. ఓ గుడ్డు కొట్టి దాంట్లో టేబుల్‌ స్పూన్‌ ఆవనూనె, రెండు చెంచాల కలబంద గుజ్జు వేసి బాగా మిక్స్‌ చేయాలి. ఈ మిశ్రమాన్ని తలకి రాసి, గంటయ్యాక తలస్నానం చేయాలి. ఇలా వారానికి రెండు సార్లు చేస్తుంటే.. జుట్టు రాలడం తగ్గుతుంది. మృదువుగా, నిగారింపుతో కనిపిస్తుంది.
3. పచ్చసొనలో కొంచెం కొబ్బరినూనె, తేనె కలపాలి. ఈ మిశ్రమాన్ని మాడుకు పట్టించి మర్దనా చేసి తరువాత చల్లని నీటితో కడిగేయండి. ఇలా చేస్తే జుట్టు బలంగా, మృదువుగా మారుతుంది. అలాగే జుట్టు చిట్లిపోయే సమస్య దూరమవుతుంది.
ఆమ్లా:
జుట్టుకు, ఉసిరికి ఉన్న సంబంధం విడతీయలేనిది. అన్నింటికన్నా ఎక్కువ ఎఫెక్ట్ నిచ్చేది ఒక్క ఉసిరి మాత్రమే. సి విటమిన్ సహా యాంటీ ఆక్సిడెంట్లు, ఖనిజ లవణాలు, అమీనో యాసిడ్స్ పుష్కలంగా ఉండే ఉసిరితో జుట్టుకు బోలెడు ప్రయోజనాలు . ఉసిరికాయల నుంచి తీసిన రసాన్ని రోజూ తాగితే.. జుట్టు రాలడం, చివర్లు చిట్లడం, తెల్లబడటం.. వంటి సమస్యలు దూరం అవుతాయి.
కొబ్బరి నూనె ,ఉసిరి నూనె సమపాళ్ళలో తీసుకొని, మాడుకు పట్టేలా రాసుకోవాలి. వారంలో రెండు సార్లయినా ఈ నూనెను తలకు పట్టించి,. మరుసటి రోజు పొద్దున తలస్నానం చేయాలి. ఇలా చేస్తే జుట్టు ఆరోగ్యంగా పెరుగుతుంది.
ఉసిరి పొడి 4 టెబుల్‌ స్పూన్లు, నిమ్మరసం 1 టేబుల్‌ స్పూన్‌ తీసుకుని మిక్స్‌ చేయండి. ఈ పేస్ట్‌ను జుట్టుకు అప్లై చేయండి. దీన్ని అరగంట పాటు ఆరనివ్వండి. ఆ తర్వాత మైల్డ్‌ షాంపుతో తలస్నానం చేయండి. ఇలా వారానికి రెండు సార్లు చేస్తే.. జుట్టు దట్టంగా పెరుగుతుంది.
