Tank Cleaned With Cow Urine In Karnataka After Dalit Woman Drinks Water
mictv telugu

దళిత మహిళ నీరు తాగిందని గోమూత్రంతో వాటర్ ట్యాంక్ క్లీనింగ్

November 21, 2022

స్వాతంత్ర్యం వచ్చి 75 ఏళ్లు దాటిన తర్వాత కూడా అంటరానితనం అనే మూఢనమ్మకం కొందరిని ఇంకా వదల్లేదు. ఓ వైపు సమానత్వం కోసం దళితులు ఇంకా పోరాడుతూ ఉండగా… దళితులపై వివక్ష చూపిస్తూనే ఉన్నారు, అవమానిస్తూనే ఉన్నారు. తాజాగా కర్ణాటకలో ఓ గ్రామంలో దళిత వర్గానికి చెందిన మహిళ కుళాయి నీరు తాగిందని ఆ ట్యాంక్‌ను గోమూత్రంతో శుద్ధి చేశారు. చామరాజనగర్ జిల్లా హెగ్గోతర గ్రామంలో ఈ ఘటన జరిగింది. రెండ్రోజుల క్రితం ఆ గ్రామంలోని ఓ పెళ్లివేడుకకు హాజరైన ఓ దళిత మహిళ…. అగ్రవర్ణాల వారు నివసించే ప్రాంతంలోని తాగునీటి ట్యాంక్‌లోని నీటిని తాగింది. ఆగ్రహానికి గురైన వారు ట్యాంక్‌లోని నీరంతా విడుదల చేసి, కొందరు పవిత్రంగా భావించే గోమూత్రంతో శుభ్రం చేశారు.

వాటర్‌ ట్యాంక్‌ శుభ్రం చేశారు కానీ అది గోమూత్రమో కాదో తాను నిర్ధారించలేనని తహసీల్దార్‌ బస్వరాజ్‌ అన్నారు. సదరు మహిళ ట్యాంక్‌ నుంచి నీరు తాగడం కూడా ఎవరూ చూడలేదని.. ఆమె తాగిందో లేదో కూడా తెలియదన్నారు. ఈ ఘటనపై వివక్ష కేసు నమోదు చేస్తామని బస్వరాజ్ చెప్పారు. గ్రామంలో అనేక ట్యాంకులు ఉన్నాయి, అక్కడ నుండి ప్రతి ఒక్కరూ నీరు త్రాగవచ్చన్నారు. ఈ ఘటన తర్వాత స్థానిక అధికారులు దళిత, ఇతర వెనుకబడిన తరగతుల (ఓబీసీ) వర్గాలకు చెందిన పలువురు గ్రామస్తులను అన్ని ట్యాంకుల వద్దకు తీసుకెళ్లి నీళ్లు తాగించారు. తదుపరి చర్యల కోసం తహశీల్దార్ జిల్లా కలెక్టర్‌కు సమగ్ర నివేదిక అందజేస్తారని తెలిపారు.