Telangana Assembly Sessions started today, Will Resume On 12th September
mictv telugu

తెలంగాణ అసెంబ్లీ సమావేశాలు ప్రారంభం.. తిరిగి సోమవారానికి వాయిదా

September 6, 2022

తెలంగాణ శాసనసభ, మండలి వర్షాకాల సమావేశాలు మంగళవారం ఉదయం 11.30 గంటలకు ప్రారంభం అయ్యాయి. తొలిరోజున సమావేశాలు ప్రారంభం కాగానే ఇటీవల మరణించిన మాజీ శాసనసభ్యులకు సభ సంతాపం ప్రకటించింది. మాజీ ఎమ్మెల్యేలు మల్లు స్వరాజ్యం, పరిపాటి జనార్ధన్‌కు సభ్యులు సంతాపం ప్రకటించిన అనంతరం సభను వాయిదా వేస్తున్నట్లు స్పీకర్‌ పోచారం శ్రీనివాస్‌రెడ్డి ప్రకటించారు. శాసనసభ తిరిగి సోమవారం(సెప్టెంబర్ 12) సమావేశం కానుంది.

అసెంబ్లీ వాయిదా అనంతరం మండలి ఛైర్మన్ గుత్తా సుఖేందర్‌రెడ్డి, శాసనసభ స్పీకర్ పోచారం శ్రీనివాస్ రెడ్డి అధ్యక్షతన సభా వ్యవహారాల నిర్వహణ కమిటీ (బీఏసీ) సమావేశం జరగనున్నది. అసెంబ్లీ సమావేశాలు ఎన్నిరోజులు నిర్వహించాలి? ఏయే అంశాలపై చర్చించాలి? వంటి అంశాలపై బీఏసీలో నిర్ణయించనున్నారు. తెలంగాణ జాతీయ సమైక్యతా వజ్రోత్సవాల సందర్భంగా ఈ నెల 16, 17, 18 తేదీల్లో రాష్ట్రవ్యాప్తంగా ఉత్సవాలు నిర్వహించాలని మంత్రివర్గం తీసుకున్న నిర్ణయంతో పాటు దళితబంధు పథకాన్ని ప్రస్తుతం నియోజకవర్గాలవారీగా అందచేస్తున్న 100 కుటుంబాలకు అదనంగా మరో 500 మందికి ఈ పథకాన్ని విస్తరించాలని మంత్రివర్గం తీసుకున్న నిర్ణయంపైనా సమావేశాల్లో సుదీర్ఘంగా చర్చ జరిగే అవకాశాలున్నాయి.