ఎలక్షన్ బంపర్ ఆఫర్… రూ.10కే ఫుల్ బాటిల్…

రేపే ఎన్నికలు. ఓటర్లను ఆకట్టుకోవడానికి రాజకీయ నేతలు కొత్త కొత్త దారులను వెతుకుతున్నారు. వారి వీక్‌నెస్ పాయింట్ మీద కొట్టి ఓట్లు రాల్చుకోవాలని రకరకాల ఆటలు ఆడుతున్నారు. ఈ క్రమంలో పేటియం నుంచి డబ్బులు ట్రాన్స్‌ఫర్ చేయటం వంటివి చేశారు. ఇప్పుడు రూ.10 ఇస్తే చాలు రూ.460 ఫుల్ మందు బాటిల్ ఇస్తున్నారు ఓ వైన్ షాపువాళ్ళు. అలాగే రూ.600 విలువగల మద్యం సీసా కేవలం రూ. 50కే ఇచ్చేస్తున్నారు. రూ.1000 మందు బాటిల్ కేవలం రూ.100కే ఇస్తున్నారు. ఇంత చవక ధరలకు మందు విక్రయిస్తున్న ఆ వైన్ షాపు పేరు సిటీ వైన్స్‌. మాదాపూర్‌లో వుంది ఈ షాపు.మరి ఇలా చీప్‌గా ఈ మందును ఎవరికి పడితే వారికి ఇవ్వరు. ఇచ్చే నోటుకు సంబంధించిన సిరీస్‌ నెంబరు సరిపోలితేనే ఇస్తారు.. లేదంటే ఇవ్వరు. ఈ బంపర్ ఆఫర్ గురించి తెలుసుకున్న మాదాపూర్‌ పోలీసులు వైన్ షాప్ మీద దాడి చేసి నిందితులను పట్టుకున్నారు. ఆ వైన్స్ మేనేజరు ప్రవీణ్‌గౌడ్‌ను అదుపులోకి తీసుకుని విచారిస్తున్నారు. దీని వెనకాల వున్న రాజకీయ నేతలు ఎవరనే కోణంలో విచారణ కొనసాగిస్తున్నారు.