బాహుబలి రచయిత.. ఆరెస్సెస్‌పై సినిమా

బాహుబలి, బజరంగీ భాయిజాన్ సినిమాలతో ప్రపంచ మార్కెట్‌ను తన వైపు తిప్పుకున్న రచయిత విజయేంద్ర ప్రసాద్. ప్రస్తుతం ఆయన వరుస సినిమాలతో బిజీగా మారారు. ఆయనతో కథారచన చేయించుకుంటే ఆ సినిమా సూపర్ డూపర్ హిట్ అవుతుందని చాలా మంది దర్శక, నిర్మాతలకు బలమైన నమ్మకం కుదిరింది.అలాంటి చేయి తిరిగిన రచయితతో పని చేయాలని ప్రతీ ఒక్కరు ఉవ్విళ్లూరుతుంటారు. ఇప్పుడు ఆ కోవలోకి బీజేపీ పార్టీ వచ్చి చేరింది. ఆయనతో కలం పట్టించి ఆర్ఎస్ఎస్ మీద మంచి కథ రాయించుకోవాలని అనుకుంటోంది.  రూ. 100 కోట్ల బడ్జెట్‌లో అత్యంత ప్రతిష్టాత్మకంగా ఈ చిత్రాన్ని నిర్మించాలని బీజేపీ భావిస్తోంది.

రాష్ట్రీయ స్వయం సేవక్ సంఘ్ (ఆరెస్సెస్) ఇప్పటి వరకు ఎదుర్కొన్న ఇబ్బందులు, సాధించిన విజయాలు, ఆరెస్సెస్ గొప్పతనాన్ని ఈ సినిమాలో చూపించనున్నారు. ఇందుకు సంబంధించిన కథను వండి వార్చే బాధ్యతను విజయేంద్ర ప్రసాద్‌కు అప్పగించింది బీజేపీ. ఇప్పటికే ఆయన కథారచనకు పూనుకున్నారని సమాచారం. ఈ సినిమాలో బాలీవుడ్‌కు చెందిన పలువురు అగ్ర తారలు నటించనున్నట్టు తెలుస్తోంది. ప్రస్తుతం విజయేంద్ర ప్రసాద్ రాణి లక్ష్మీబాయి జీవిత కథతో రూపొందుతున్న ‘ మణికర్ణిక ’ చిత్రం కోసం పని చేస్తున్నారు. ఈ సినిమాలో కంగనా రనౌత్ ముఖ్యపాత్ర పోషిస్తుండగా, క్రిష్ దర్శకత్వం వహిస్తున్నారు.