tiger changed its route from Kakinada to Anakapalli
mictv telugu

కాకినాడ నుంచి అనకాపల్లికి రూటు మార్చిన పెద్దపులి

June 29, 2022

tiger changed its route from Kakinada to Anakapalli

ఇన్నాళ్లూ కాకినాడ జిల్లా వాసులను భయపెట్టిన పెద్దపులి ఇప్పుడు అనకాపల్లి జిల్లాకు తరలివెళ్లింది. ఆ జిల్లాలోని నక్కపల్లి మండలం తిరుపతిపాలెం దగ్గర పులి అడుగుజాడలను అటవీశాఖ అధికారులు గుర్తించారు. తటపర్తి వద్ద గేదెపై పులి దాడి చేసింది.

దీంతో పాయకరావుపేట పరిధిలోని శ్రీరామపురం, తిరుపతిపాలెం, తడపర్తి, వెంకటాపురం గ్రామాల ప్రజలను అప్రమత్తం చేశారు. అంతకుముందు సోమవారం రాత్రి 8 గంటల సమయంలో కాకినాడ జిల్లా తుని సమీపంలోని కుమ్మరిలోవ పరిధిలోని కుచ్చులకొండ వైపు పులి సంచరించినట్టు సమాచారం. తాండవ నదీ పరివాహక ప్రాంతానికి వెళ్తున్న పులి తుని – కొట్టాం రహదారిపై కాసేపు ఆగిందని ప్రత్యక్ష సాక్షులు తెలిపారు. రొయ్యల ఫ్యాక్టరీలో పనిచేస్తున్న కార్మికులు ప్రయాణించే బస్సు లైట్ల వెలుతురును కాసేపు చూసిన పులి.. ఇటువైపున్న తాండవ నదిని దాటలేక కుచ్చులకొండపైకి వెళ్లిపోయిందని వెల్లడించారు.