Tomato prices fell heavily in Anantapur and Kurnool districts
mictv telugu

టమాట రైతులకు భారీ షాక్‌.. భారీగా తగ్గిన ధర..

August 7, 2022

ఒక్కోసారి సెంచరీకి చేరే కిలో టమాటా రేటు.. ఇప్పుడు కేవలం నాలుగు రూపాయలకు పడిపోవడం.. రైతులకు కన్నీళ్లను తెప్పిస్తోంది. అనంతపురం, కర్నూలు జిల్లాల్లో టమోటా ధరలు భారీగా పడిపోయాయి. అనంతపురంలో 15 కిలోల టమోటా బాక్సు.. కేవలం 60రూపాయలలోపే ఉందంటే.. టమోటా పరిస్థితి ఎలా ఉందో అర్థం చేసుకోవచ్చు. దీంతో రైతులు లబోదిబోమంటున్నారు. ట్రాన్స్‌పోర్ట్ ఛార్జీలు కూడా రావడం లేదని రోడ్డుపైనే టమోటాలను పారబోస్తున్నారు. ఎకరాకు లక్ష రూపాయల చొప్పున నష్ట పోయామంటున్న రైతులు.. వెంటనే రాష్ట్ర ప్రభుత్వం తమను ఆదుకోవాలని వేడుకుంటున్నారు.

ఇక, కర్నూల్‌లోనూ భారీగా పతనమైంది టమాట ధర. రైతుల నుంచి 30కిలోల బాక్సును రూ. 40లకు కొనుగోలు చేస్తున్నారు వ్యాపారులు. వినియోగదారులకు మాత్రం 10 నుంచి రూ. 14లకు విక్రయిస్తున్నారు. దీంతో ఆరుగాలం శ్రమించినా పెట్టుబడులు కూడా రావడం లేదని ఆవేదన వ్యక్తం చేస్తున్నారు రైతులు. మార్కెట్లకు లోడ్ల కొద్దీ టమోటా రావడంతోనే ఈ పరిస్థితి వచ్చినట్టు తెలుస్తోంది. దీంతో మార్కెట్‌కు తీసుకురావడం కూడా వృథాగా భావించి… రోడ్లపైనే పారబోస్తున్నారు రైతులు.