రాష్ట్రవ్యాప్తంగా సంచలనం సృష్టించిన TSPSC పేపర్ లీకేజ్ వ్యవహారంలో తవ్వేకొద్దీ విస్తుపోయే వాస్తవాలు వెలుగులోకి వస్తున్నాయి. పోలీసులు, రిమాండ్ రిపోర్ట్లో కీలకమైన విషయాలను వెల్లడించారు. ఈ లీకేజీ వ్యవహారంలో ప్రధాన నిందింతుడు ప్రవీణ్ నేరం చేసినట్లు ఒప్పుకున్నాడని పోలీసులు తెలిపారు. ఈ లీకేజీ వ్యవహారాన్ని ఎలా వర్కౌట్ చేశారో పూస గుచ్చినట్లు రిమాండ్ రిపోర్ట్లో పేర్కొన్నాడు ప్రవీణ్.
TSPSC లో సెక్రటరీ పీఏగా వ్యవహరిస్తున్న ప్రవీణ్ కుమార్ ప్లాన్ వేసి మెయిన్ సర్వర్ నుంచే క్వశ్చన్ పేపర్ను దొంగిలించాడు. లూప్ ఉన్న కంప్యూటర్ల నుంచి పేపర్ను సేకరించాడు. ఆ తరువాత ఈ పేపర్ ప్రింటౌట్ను రేణుకకు ఇచ్చాడు.పేపర్ను అమ్మేందుకు రేణుకతో పాటు ఆమె ఫ్యామిలీ చాలా స్కెచ్లు వేసినట్లు ప్రవీణ్ తెలిపాడు. ఒక్కో పేపర్కు రూ.20 లక్షలు డిమాండ్ చేసింది రేణుక. రేణుక భర్త, బ్రదర్ ఇద్దరూ ఆమెకు ఈ విషయంలో హెల్ప్ చేశారు. పేపర్ తమ దగ్గర ఉందని వారి కమ్యూనిటీ మొత్తం చెప్పినా పెద్దగా ఎవరూ స్పందించలేదు.. వనపర్తికి చెందిన ఇద్దరు అభ్యర్ధులు అంత మొత్తం చెల్లించేందుకు ఊ అన్నారు. దీంతో రేణుక ఆ అభ్యర్ధులను ఏకంగా తన ఇంటికే రప్పించుకుని వారిని ప్రిపేర్ చేసింది. ఆ తరువాత సరూర్ నగర్లోని ఎగ్జామ్ సెంటర్కు తానే స్వయంగా దింపి వెళ్లిపోయిందని ప్రవీణ్ రిమాండ్ రిపోర్ట్లో వెల్లడించాడు. అదే విధంగా ప్రవీణ్ ఫోన్లోని మహిళల కాంటాక్ట్స్ విషయాన్ని కూపీ లాగారు పోలీసులు. అయితే ఇది హనీ ట్రాపా లేదా పక్కా స్కెచ్ వేసి చేస్తున్న కుంభకోణమా అన్నది మాత్రం ఇంకా తెలియాల్సి ఉంది.
పేపర్ లీకేజీ వ్యవహారంతో సంబంధం ఉన్న 9 మంది నిందితులను నాంపల్లి కోర్టులో పోలీసులు హాజరుపరిచారు. కోర్టు వారికి 14 రోజుల రిమాండ్ ను విధిస్తూ తీర్పును ఇచ్చింది. తీర్పు నేపథ్యంలో వైద్య పరీక్షల నిమిత్తం నిందితులకు ఉస్మానియా ఆసుపత్రిలో పరీక్షలు నిర్వహించారు. అనంతరం చంచల్గూడ జైలుకు వారిని తరలించారు.
