Village elders who burned a man alive in Assam
mictv telugu

పంచాయితీలో దోషిగా తేల్చి వ్యక్తిని సజీవ దహనం చేసిన గ్రామ పెద్దలు

July 11, 2022

చాలా వరకు గ్రామాల్లో ఏదైనా సమస్య వస్తే గ్రామ, కుల పెద్దలు కూర్చుని పరిష్కరించేందుకు కృషి చేస్తారు. దాదాపు 90 శాతం సమస్యలు ఈ పంచాయితీల్లోనే పరిష్కారానికి నోచుకుంటాయి. కానీ, కొన్ని మాత్రం తీవ్ర వివాదాస్పదమవుతుంటాయి. ఇలాంటి ఘటన ఒకటి అసోంలో జరిగింది. గ్రామ పెద్దలు పంచాయితీ పెట్టి ఓ వ్యక్తిని దోషిగా తేల్చి నిలువునా తగులబెట్టేశారు. అనంతరం మృతదేహాన్ని పూడ్చి పెట్టారు. స్థానికంగా సంచలనం రేపిన ఈ ఘటన పూర్తి వివరాలు ఇలా ఉన్నాయి. నాగోన్ జిల్లాలోని బోర్‌లులుగావ్ గ్రామంలో ఇటీవల ఓ మహిళ హత్య జరిగింది. రంజిత్ బార్దోలోయ్ అనే వ్యక్తిపై అనుమానంతో గ్రామ పెద్దలు పంచాయితీ నిర్వహించారు. అందులో రంజిత్‌ను దోషిగా తేల్చారు. తర్వాత శిక్షగా అందరి ముందే అతడిపై పెట్రోల్ పోసి నిప్పంటించారు. అనంతరం శవాన్ని గుంత తీసి పూడ్చి పెట్టారు. ఈ విషయం ఆలస్యంగా తెలుసుకున్న పోలీసులు గ్రామానికి చేరుకుని పూడ్చిన శవాన్ని వెలికితీసి పోస్టుమార్టానికి పంపారు. శవానికి 90 శాతం పైగా కాలిన గాయాలుండగా, పలువురు గ్రామపెద్దలను అదుపులోకి తీసుకొని ప్రశ్నిస్తున్నారు. వారిపై కేసు నమోదు చేసుకొని విచారిస్తున్నారు.